असार १ – बाजुरा जिल्लाको स्वामीकार्तिक खापर गाउँपालिका–४ मा एक युवतीमाथि अज्ञात समूहले मध्यरातमा चक्कु प्रहार गरेको घटना सार्वजनिक भएको छ।
प्रहरीका अनुसार ३६ वर्षीया ठुमुरा बिष्टमाथि आइतबार राति करिब १० बजे सुतिरहेको अवस्थामा २–३ जनाको अज्ञात समूहले आक्रमण गरेको हो। प्रारम्भिक अनुसन्धानबाट ती व्यक्तिहरूले बिष्टलाई भान्साघरतर्फ बोलाएर घाँटीको बायाँ भागमा चक्कु प्रहार गरेको खुलेको छ।
घटनापछि घाइते बिष्टको तत्काल उद्धार गरी उपचारका लागि नेपालगन्ज लगिएको प्रहरीले जनाएको छ। हाल उहाँको अवस्था निगरानीमा राखिएको र थप उपचार भइरहेको बताइएको छ।
जिल्ला प्रहरी कार्यालय बाजुराले घटनामा संलग्न व्यक्तिहरूको खोजी कार्य तीव्र बनाइएको जनाएको छ। घटनाको कारण खुल्न बाँकी रहेको र विभिन्न कोणबाट अनुसन्धान भइरहेको प्रहरीको भनाइ छ।
स्थानीयवासीले शान्त र सुरक्षित मानिने क्षेत्रमा यस्तो घटना घटेकाले दोषीलाई यथाशीघ्र पक्राउ गरी कानुनी कारबाही गर्न माग गरेका छन्। घटनाले गाउँमा त्रासको वातावरण सिर्जना भएको छ भने महिला सुरक्षाप्रति समेत चिन्ता बढाएको छ।
प्रहरीले घटनाबारे थप तथ्य संकलन गरिरहेको र अनुसन्धान निष्कर्षमा पुगेपछि विस्तृत विवरण सार्वजनिक गरिने जनाएको छ।उहाँ आफ्नो माईती गाउँ वाईमा सानो ब्यवसाय गर्दै आउनुभएको थियो।