असार १० मेघराज भट्ट
बाजुरा – स्वामिकार्तिक खापर गाउँपालिकाको १८औँ गाउँसभा अधिवेशनमा आगामी आर्थिक वर्ष २०८३/०८४ का लागि ४४ करोड १६ लाख २ हजार रुपैयाँको बजेट प्रस्ताव गरिएको छ। गाउँपालिकाले विकास निर्माण, सेवा प्रवाहको प्रभावकारिता वृद्धि तथा स्थानीय आवश्यकता सम्बोधनलाई केन्द्रमा राख्दै उक्त बजेट प्रस्तुत गरेको हो।
गाउँसभामा गाउँपालिका उपाध्यक्ष सुलोचना भण्डारीले बजेट तथा कार्यक्रम प्रस्तुत गर्दै चालु आर्थिक वर्ष २०८२/०८३ को प्रगति विवरण समेत सार्वजनिक गर्नुभयो। उहाँका अनुसार चालु आर्थिक वर्षका लागि गाउँपालिकाको कुल विनियोजित बजेट ३८ करोड ३ लाख ६७ हजार १ सय ६९ रुपैयाँ रहेको थियो। हालसम्म उक्त बजेटमध्ये २५ करोड २८ लाख ५४ हजार १ सय ७ रुपैयाँ ५१ पैसा निकासा भएको उहाँले बताउनुभयो।
गाउँसभामा प्रस्तुत निकासा भएको रकममध्ये हालसम्म २७ करोड १७ लाख ५४ हजार ४ सय ५५ रुपैयाँ २६ पैसा खर्च भएको छ। विभिन्न विकास निर्माणका आयोजना, सामाजिक सुरक्षा, शिक्षा, स्वास्थ्य, कृषि तथा प्रशासनिक क्षेत्रका कार्यक्रममार्फत बजेट कार्यान्वयन भइरहेको गाउँपालिकाले जनाएको छ।
आगामी आर्थिक वर्ष २०८३/०८४ का लागि गाउँपालिकाले आन्तरिक राजस्व, संघीय तथा प्रदेश सरकारबाट प्राप्त हुने वित्तीय हस्तान्तरण लगायतका स्रोतबाट ४४ करोड १६ लाख २ हजार रुपैयाँ आय हुने अनुमान गरेको छ। सोही बराबरको ४४ करोड १६ लाख २ हजार रुपैयाँ व्यय अनुमान समेत गाउँसभामा पेश गरिएको गाउँपालिका प्रवक्ता सिंह धामीले जानकारी दिनुभयो।
गाउँपालिकाले आगामी वर्षको बजेटमा पूर्वाधार विकास, कृषि तथा पशुपालन प्रवर्द्धन, शिक्षा र स्वास्थ्य सेवाको गुणस्तर सुधार, खानेपानी तथा सरसफाइ, पर्यटन विकास, युवा तथा महिला लक्षित कार्यक्रम, रोजगारी सिर्जना र सामाजिक सुरक्षालाई प्राथमिकतामा राख्ने जनाएको छ।
प्रस्तावित बजेटअन्तर्गतका विस्तृत कार्यक्रम, योजना तथा क्षेत्रगत विनियोजनको विवरण गाउँसभाको आगामी बैठकमा प्रस्तुत गरिने बताइएको छ। गाउँपालिका अध्यक्ष भरत बहादुर रोकायाले स्थानीय जनताको आवश्यकता र अपेक्षालाई सम्बोधन गर्दै समृद्ध स्वामिकार्तिक खापर निर्माणको लक्ष्यअनुसार बजेट ल्याइएको बताउनुभयो।
उहाँले आगामी आर्थिक वर्षमा विकास निर्माणका कार्यलाई थप प्रभावकारी बनाउने, सेवा प्रवाहलाई सहज र पारदर्शी बनाउने तथा शिक्षा, स्वास्थ्य, कृषि, पर्यटन र रोजगारका क्षेत्रमा उल्लेखनीय उपलब्धि हासिल गर्ने गरी बजेट तथा कार्यक्रम केन्द्रित गरिएको बताउनुभयो।
१८औँ गाउँसभा अधिवेशनमा जनप्रतिनिधि, कर्मचारी, राजनीतिक दलका प्रतिनिधि, सरोकारवाला निकाय तथा स्थानीयवासीहरूको उल्लेखनीय सहभागिता रहेको थियो। गाउँसभामा प्रस्तुत बजेट तथा कार्यक्रममाथि छलफल गरी आवश्यक सुझाव संकलन गरिने र त्यसपछि अन्तिम स्वीकृतिका लागि प्रक्रिया अघि बढाइने गाउँपालिकाले जनाएको छ।
