बाजुरा, असार ७ — धनगढीबाट बाजुरातर्फ आउँदै गरेको पवनदूत यातायातको बस आइतबार बिहान बुढीगंगा नगरपालिका–१० स्थित मालिका बजार नजिक दुर्घटनामा परेको छ। दुर्घटनामा परी प्रारम्भिक जानकारीअनुसार २३ जना यात्रु घाइते भएका छन्।
सु.प.प्र. १३५५ नम्बरको उक्त बस बिहान करिब ७ः२० बजे ब्रेक फेल भएपछि अनियन्त्रित भई दुर्घटनामा परेको बताइएको छ। दुर्घटनालगत्तै स्थानीय बासिन्दा, व्यापारी, नेपाल प्रहरी, यातायात व्यवसायी तथा जनप्रतिनिधिहरूको सक्रिय सहयोगमा उद्धार कार्य सञ्चालन गरिएको थियो।
घाइते यात्रुहरूलाई तत्काल उपचारका लागि जिल्ला अस्पताल बाजुरा तथा बयालपाटा अस्पताल अछाम पठाइएको छ। केही घाइतेको अवस्था सामान्य रहेको र अन्यको स्वास्थ्य अवस्थाबारे थप विवरण आउन बाँकी रहेको प्रहरीले जनाएको छ।
दुर्घटनापछि केही समय सडक क्षेत्रमा आवागमन प्रभावित भए पनि उद्धार टोलीले तत्काल व्यवस्थापन गरेको थियो। घटनाबारे थप अनुसन्धान भइरहेको र दुर्घटनाको विस्तृत विवरण सङ्कलन भइरहेको सम्बन्धित निकायले जनाएको छ।
स्थानीयवासीले समयमै उद्धार कार्य सम्पन्न भएकाले ठूलो मानवीय क्षति हुन नपाएको बताएका छन्। दुर्घटनाले यात्रु तथा उनका आफन्तलाई चिन्तित बनाएको छ भने घाइतेहरूको शीघ्र स्वास्थ्य लाभको कामना गरिएको छ।
