बाजुरा, १४ असार ।
बाजुराको स्वामिकार्तिक खापर गाउँपालिका वडा नं. २ मा ‘आमा पहिलो’ कार्यक्रम अन्तर्गत छुटेका बाँकी ४०० भन्दा बढी घरधुरीका आमाहरूलाई खाद्यान्न सहयोग गरिएको छ। आइतबार एक विशेष कार्यक्रमका बीच वडाका भुकाहाँ, बेर्मा र माझगाउँका रैथाने तथा लक्षित परिवारका आमाहरूलाई जनही ५० किलोग्रामका दरले चामल वितरण गरिएको हो।
गाउँपालिकाको गौरवको योजनाका रूपमा रहेको ‘आमा पहिलो’ कार्यक्रम अन्तर्गत यसअघि नै विभिन्न वडामा खाद्यान्न वितरण गरिसकिएको थियो। वडा नं. २ मा प्राविधिक तथा अन्य कारणले छुट्न पुगेका परिवारहरूलाई समेट्दै आइतबार दिउँसो पालिकाले घरदैलोमै पुगेर चामल हस्तान्तरण गरेको हो।
गाउँपालिकाका अध्यक्ष भरत बहादुर रोकायाले खाद्यान्न वितरण गर्दै पालिकाभित्रका कुनै पनि आमाहरू पोषण र खाद्यान्न अभावबाट पीडित हुन नपरोस् भन्ने उद्देश्यले कार्यक्रम ल्याइएको बताउनुभयो।
”हाम्रो पालिकाका आमाहरूको स्वास्थ्य र पोषण हाम्रो पहिलो प्राथमिकता हो। कोही पनि आमा नछुटून् र सबैले स्थानीय सरकार भएको महसुस गर्न सकून् भनेर हामी आफैं गाउँमा पुगेर चामल वितरण गरेका हौं,” अध्यक्ष रोकायाले भन्नुभयो।
पछिल्लो समय गाउँपालिकाले कृषि, स्वास्थ्य र सामाजिक सुरक्षालाई जोड दिँदै आएको छ। चामल पाएपछि स्थानीय भुकाहाँ, बेर्मा र माझगाउँका आमाहरूले खुसी व्यक्त गरेका छन्। ग्रामीण क्षेत्रमा खाद्यान्नको संकट भइरहने समयमा पालिकाले ५० किलो चामल हातमा थमाइदिएपछि स्थानीयहरूले स्थानीय सरकारको यो कदमको निकै प्रशंसा गरेका छन्।
